मन्त्री उमाकान्त चौधरी जर्मनीतिर लागेपछि राज्यमन्त्री खड्गबहादुर बस्याल हेलिकोप्टरमा जाजरकोट पुगे, तर औषधि बोकेका खच्चड गाउँ पुगेका छैनन्
वीरबहादुर, ठाकुरसिंह जाजरकोट, नेपालगन्ज, १७ साउन
महामारी प्रभावित क्षेत्रमा मन्त्री र नेताहरूका हेलिकोप्टर घुमेकाघुम्यै छन्, औषधि नपाएर सर्वसाधारण जनता मरेकामर्यै छन् । शुक्रबार र शनिबार पनि स्वास्थ्य राज्यमन्त्री खड्गबहादुर बस्याललाई बोकेर हेलिकोप्टर झाडापखालाले ग्रस्त जाजरकोटको आकाशमा उडिरह्यो, तर जीवनजल बोकेका खच्चड भने गाउँ कहिले पुग्ने हुन्, पत्तो छैन ।
राज्यमन्त्री बस्याल हेलिकोप्टरमा उडिरहेका थिए, झाडापखालाले ग्रस्त जनता औषधि नपाएर छटपटाइरहेका थिए । शनिबार मात्र पनि जाजरकोटको नायकबाडा- ८ का पृथ्वीबहादुर महतरा र भगवती गाविस- ६ की शाही थरकी महिलाको मृत्यु भएको छ ।
जाजरकोटका स्वास्थ्य प्रमुख डा. कृष्णहरि सुवेदी औषधि बोकेका खच्चड गाउँतिर गइरहेको बताउँछन् । तर, सदरमुकामबाट प्रभावित क्षेत्रमा पुग्न खच्चडलाई तीन दिन लाग्छ । मन्त्रीका हेलिकोप्टर भने छिनछिनमा उड्दै छिनछिनमा बस्दै गरेका छन् ।
'हेलिकोप्टरले त औषधि बोक्नुपर्ने हो, मन्त्री बरु खच्चडमा आए पनि हुने हो,' जाजरकोटको मजकोट गाविसका पूर्वअध्यक्ष वेदबहादुर शाहीले आक्रोश पोखे, 'बिरामी परेको तीन घन्टामै मान्छेको मृत्यु हुन्छ । खच्चडबाट औषधि तीन दिनपछि पुर्याएर के गर्नु ?'
'नेताहरू आकाशमा घुम्छन् जान्छन् । तल हामी औषधि नपाएर मर्ने भयौँ । सरकारले नेता घुमाउनुभन्दा औषधि पुर्याए हामी अकालबाट जोगिने थियौँ,' नायकबाडा- ९ का मानबहादुर चलाउनेले गुनासो गरे ।
सेनाको हेलिकोप्टरले औषधि सदरमुकामसम्म पुर्याउने गरेको छ । तर, प्रभावित क्ष्ाेत्रमा औषधि पुर्याउने जिम्मा खच्चडको छ । कतिपय गाउँमा त खच्चडले पनि औषधि पुर्याउन सकेको छैन । जिल्ला स्वास्थ्य प्रमुख डा. सुवेदी नै भन्छन्, 'कतिपय ठाउँमा खच्चड जाने बाटो पनि छैन । कसरी पुर्याउने औषधि ?,' उनले प्रतिप्रश्न गरे । छिटो औषधि पठाउन सके महामारी छिटो नियन्त्रण हुन्छ भन्ने जानेरै पनि समयमा औषधि पुर्याउन नसकिएको उनले पनि स्विकारे ।
खच्चड पुग्न नसक्ने गाउँमा भरिया लगाएर औषधि पुर्याउने प्रयास भइरहेको सुवेदीले बताए । 'मान्छेले नै बोेकेर जाने ठाउँमा त एक साताभन्दा बढी लाग्छ,' उनले भने ।
वैशाखको दोस्रो सातादेखि झाडापखाला र हैजाको महामारी फैलिएपछि जाजरकोटको विभिन्न गाउँमा प्रधानमन्त्री, मन्त्री र राजनीतिक दलका नेताहरू हेलिकप्टरमार्फत भ्रमण गर्दै आएका छन् । जाजरकोटमा हेलिकोप्टरमार्फत प्रधानमन्त्री माधवकुमार नेपाल, स्वास्थ्यमन्त्री उमाकान्त चौधरी, तत्कालीन स्वास्थ्यमन्त्री गिरिराजमणि पोख्रेल, माओवादी वरिष्ठ नेता डा. बाबुराम भट्टराईलगायत पुगेका छन्, तर रित्तो हात ।
हेलिकोप्टर चढेर केही दिनअघि खलंगा पुगेका स्वास्थ्यमन्त्री उमाकान्त चौधरीसमक्ष जिल्लावासीले आक्रोश पोखेका थिए । झाडापखालाको महामारीले जनता मरिरहँदा पनि मन्त्रीहरू 'टुरिष्ट'को रूपमा रमिता हेर्न मात्र जिल्ला आएको गुनासो उनीहरूको थियो । तर, काठमाडौं पुगेर औषधि ल्याउने वाचा गरेर फर्किएका मन्त्री चौधरी जर्मनीतिर हानिएका छन् । उनको सट्टा जिल्ला पुगेका राज्यमन्त्री बस्यालले एक क्विन्टल औषधि लगेका थिए । तर, जिल्लाभरि नै महामारी फैलिएकाले त्यो औषधि नाम मात्रको भएको छ ।
'त्यति औषधिले पुग्दैन । निक्कै धेरै चाहिन्छ,' जिल्ला स्वास्थ्य प्रमुख डा. सुवेदीले भने, 'खच्चडबाट पठाइएको औषधि पुग्छ-पुग्दैन थाहा छैन, त्यसैले सरकारले औषधि पुर्याउनका लागि वैकल्पिक व्यवस्था तत्काल मिलाउनुपर्दछ ।नयाँ पत्रिका
No comments:
Post a Comment