बाघसँग जम्काभेट भएमा के होला ?

बाघलाई थुनिन् महिलाले 

वीरेन्द्र केसी अर्घाखाँची, २०६६ पुस १४ - एकाबिहानै दैलो उघार्दा बाघसँग जम्काभेट भएमा के होला ? कमजोर मन भएकाको होस गुमेर बेहोस हुने मात्र होइन, ज्यानै गुम्नसक्छ । तर साहस गर्दै प्रतिकार गरे आफूमात्र होइन अरूलाई पनि बचाउन सकिन्छ भनेर देखाएकी छन् खाँचीकोट ३, खानीगाउँकी ४५ वर्षीया माया नेपालीले ।
ब्युँझिएलगत्तै घरबाहिरै रहेको भर्‍याङबाट तल ओर्लेर सोमबार बिहान ४ बजे झिसमिसेमा भुइँतलाको ढोका खोल्दा बाघले झम्टिएर उनलाई गाज्न पुग्यो । बाख्राहरू बाँध्ने र भान्छा रहेको उक्त तल्लो तलामा उनी आत्तिएर छिरिन्, बाघ पनि आक्रमण गर्दै छिर्‍यो ।
'झम्टदै बाघ शरीरमाथि चढ्यो । कताबाट जोस आयो थाहा भएन, बेस्सरी लात्ताले हानेर पल्टाएँ, बाघसँग जुद्धदै बाख्राहरूको दाम्लो खोलिदिएँ, बाख्राहरूसँगै म पनि निस्कन भ्याएँ,' घाइते मायाले भनिन्, 'उफ्रेर झम्टन खोज्दै थियो, ढोका तानेर बाहिरबाट चुकुल लगाइदिएँ ।'
उनी तल बाघसँग कुस्ती खेल्दै ज्यान बचाइरहँदा परिवारका अन्य सदस्य माथि सुतिरहेका थिए । बाघलाई थुनेपछि उनले सुतिरहेका श्रीमान बिनबहादुर र छोराबुहारीलाई उठाएकी थिइन् । उनले बाघ थुनेको थाहापाएपछि परिवार सबै आश्चार्यमा परे । 'बहादुरीपूर्वक बाघसँग लडेर आफनो र हामी सबैको ज्यान बचाइन्' श्रीमान बिनबहादुरले भने ।
बाघ हेर्न छिमेकी मात्र होइन वरपरका गाउँबाट सर्वसाधारणको भीड लागेको थियो । प्रमुख जिल्ला अधिकारी बलभद्र गिरी, सहायक वन अधिकृत रामचन्द्र कँडेल लगायतका सरकारी अधिकारीहरू पनि पुगेका छन् । सबैले मायाको बहादुरीको प्रंशसा गरेका थिए । घटनास्थललाई जिल्ला वन कार्यालय अर्घाखाँचीले नियन्त्रणमा लिएको छ । आइतबार साँझ अबेरसम्म पनि बाघ थुनिएकै अवस्थामा छ । वनका अधिकारीहरूले मध्यरातमा बाघलाई सतर्कतापूर्वक निकालेर छाडिदिने बताए । सुरुमा बाघलाई राष्ट्रिय निकुञ्जमा लैजाने योजना बनाए पनि बेहोस पार्ने कर्मचारी आउन असमर्थता जनाएका थिए । सहायक वन अधिकृत कँडेलका अनुसार करिब ६ फिट लामो उक्त बाघ आठ वर्ष उमेरको र डरलाग्दो भएको अनुमान गरिएको छ ।
सदरमुकामदेखि २० किलोमिटर दक्षिणीस्थित खानीगाउँकी मायालाई आक्रमणबाट दाहिने खुट्टा र तीघ्रामा चोट लागेको छ ।